الرئيسية
ياللي فتحت البتاع فتحك على مقـفول
لان اصل البتاع واصل على موصول
فاي شيء في البتاع الناس تشوف على طول
والناس تموت في البتاع فيبقا مين مسئول
وازاي هتفتح بتاع في وسط ناس بتقول
بان هذا البتاع جاب الخراب بالطول
لان حتة بتاع جاهل غبي مخبول
امر بفتح البتاع لانه كان مسطول
وبعد فتح البتاع جابو الهوا المنقول
نكش عشوش البتاع وهد كوم واصول
وفات في غيط البتاع ام سمم المحصول
وخلى لون البتاع اصفر حزين مهذول
وساد قانون البتاع ولا عله ولا معلول
فالقاضي تبع البتاع فالحق ع المقتول
والجهل زاد في البتاع ولا مقري ولا منقول
والخوف سرح في البتاع خلى الديابه تصول
يبقا البتاع في البتاع والناس صايبها ذهول
وان حد قال دا البتاع يقولو مش معقول
وناس تعيش بالبتاع وناس تموت بالفول
وناس تنام ع البتاع وناس تنام كشكول
ادي اللي جابه البتاع جاب الخراب مشمول
لان حتة بتاع مخلب لراس الغول
باع البتاع بالبتاع وعشان يعيش على طول
عين حرس بالبتاع وبرضه مات مقتول
رائعه /احمد فؤاد نجم
